>ရှက်ပြုံး ရှင်လူ
>===========
>27,Feb 2016 နေ့ က မိုးညှင်းဝိပဿနာ တိုက်သစ်မှာ ပြုလုပ်တဲ့ နေလအောင်တို့ မင်္ဂလာဦးဆွမ်းကြွေးအလှူကိုသွားဖို့ လက်ျာဝင်းတို့နဲ့ချိတ်ထားခဲ့တယ်။ နေရာအတိအကျမသိလို့တယောက်တည်းမသွားတတ်။အဲဒီနေ့ မနက်မှာပဲ လက်ျာဝင်းကဖုန်ဆက်လာတယ် ၊ အကိုကြီး ရွှေဂုံတိုင်မှတ်တိုင်ကစောင့်နေတဲ့ ၊အင်းဒါဆို ကိုယ်က တောင်ဥက္ကလာ ၄ ရပ်ကွက်နေတာဆိုတော့
>ချော်တွင်းကုန်းက ဆူးလေကားသွားစီးရင်မြန်မလားပေါ့ ဆိုတော့ လက်ျာက အကိုကြီး အဲဒါဆို အဝေးကြီးလမ်းပြန်လျောက်နေရမယ်
>တာမွေအဝိုင်းထိပ်ကပြောင်းစီး တဲ့၊ ကိုယ်က အသွားအလာနည်းတဲ့သူဆိုတော့ ဘတ်စကားစီးမယ်ကြံတိုင်းပြဿနာပေါ်လေ့ရှိတယ်
>ဘတ်စကားလိုင်းတွေကလည်းဟိုတုန်းကလိုမဟုတ် ခုတမျိုးတော်ကြာတမျိုး၊ဒီကြားထဲ မှတ်တိုင်မဆုံးပဲ ဂိတ်ဆုံးချင်ဆုံးနေတတ်တာမို့ ဒီကောင်တွေကိုသောက်ညင်ကပ်ပြီး ဟိုနားဒီနားစက်ဘီးကိုသာအားကိုးပြီး
>ဘတ်စကားစီးခဲလေတော့ မလွဲမသွေကိစ္စမျိုးကျ အခက်ကြုံမြဲ။ ခုမှတွေးမိတာက မာလာကွေ့သွားပြီး ၃၆ စီးရင် ရွှေဂုံတိုင်ရောက်နိုင်တယ်၊ရောက်နိုင်တယ်ဆိုတာက (ရောက်နိုင်တယ်တွေးတာက ဒီ....ကောင်တွေ ခရီးစဉ်လမ်းကြောင်းအရင်အတိုင်းဆိုရင်) ဒါနဲ့ မာလာကွေ့ကိုထွက်ခဲ့တယ်။
>၃၆ ကို ရွှေဂုံတိုင်ရောက်လားမေးပြီးစီးမယ်ပေါ့။ မထင်မှတ်ပဲ ၁၀၇ မီနီဘတ်စတစီးထိုးဆိုက်လာလို့ မေးလိုက်တော့ အဆင်ပြေသွားတယ် ရွှေဂုံတိုင်ကို ချောမောစွာရောက်သွားတယ်။မှတ်တိုင်ဆင်းပြီး ရွှေညောင်ပင်ဒံပေါက်ဆိုင်ရှေ့ကနေ လက်ျာတို့ကိုစောင့်ပေါ့။ ဒီအချိန်မှာပဲ ဒီခွေးကိုတွေ့ပြီး စိတ်ဝင်စားတာကြောင့် ဖုန်းကင်မရာနဲ့ ဓာတ်ပုံရိုက်လိုက်တယ်၊ ကြည့်ပါဦး ကားမှတ်တိုင်နားက
>၃ပေပတ်လည်မရှိတရှိ အုတ်ကြားမြက်ဖုတ်.ပေါ်မှာ ဇိမ်နဲ့အိပ်နေလိုက်တာ။
>ရှင်လူ သူ့ကိုကြည့်ရင်းသဘောကျသွားတယ်။
>ဒီကောင်အတော်ဇိမ်ခံတတ်တာပဲ၊ အင်း နေရာကောင်းရွေးပြီးစည်းစိမ်ခံတဲ့အလုပ်ကို ခွေးတောင်လုပ်တတ်ပေါ့၊ အိပ်စား ကာမ ကိစ္စတွေမှာ ခွေးနဲ့လူ မခြားဘူး ၊ ခြားနားအောင်ဘယ်လိုနေကြမလဲ...။ ရှင်လူတော့ ဒီအသက်အရွယ်ထိ ခွေးလောက်အရည်အချင်းတွေနဲ့ နေလာတာ ဘယ်လောက်များပြီလဲ။ ကိုယ့်ကိုယ်ကိုပြန်တွေးပြီး တချို့ကိစ္စတွေအတွက်ရှက်မိပါရဲ့...
No comments:
Post a Comment