အရိုင်းပန်းတပွင့်အကြောင်း🎃🤗🙄😓😠🎃😓 😠🤔🎃
၂၀၂၄ နိုဝင်္ဘာ မှာရှင်လူ့ပါတနာ လုပ်ဖော်ကိုင်ဘက် ကြီး ရုတ်တရက်
ဆုံးသွားခဲ့တယ်။ မနက် ၅ နာရီလောက်အလုပ်က သူ့အိမ်ကိုပြန်ဖို့ ဘက်ထရီဘီးလေးတွန်းထွက်ရင်း"ဦးရှင်
သွားတော့မယ်"ဆိုပြီး နှုတ်ဆက်လို့ ရှင်လူကသံတံခါးသော့ခတ်ရင်းကျန်ခဲ့တယ်။သူထွက်သွားပြီး ဆယ့်ငါးမိနစ်လောက်ကြာတော့ ဖုန်းဝင်လာလို့ ကောက်ကိုင်လိုက်တာ"----ဆုံးသွားပြီ"တဲ့။ဖြစ်စဉ် က သူဘက်ထရီဘီးလေးနဲ့ထွက်သွားပြီး
မလှမ်းမကမ်းကဘီးလပ်မြေစက်ရုံရှေ့အရောက် ကုမ္ပဏီကားတစီးကနောက်ကဝင်တိုက်လိုက်တာတခါထဲ ပွဲချင်းပြီးရောတဲ့။အင်း
နေ့မြင်ညပျောက်တောင်မဟုတ် မိနစ်ပိုင်းနဲ့ပျောက်သွားခဲ့ရတာ။ အဲ့နောက်ပိုင်း လုပ်ခွင်(လုံခြုရေး)တာဝန်က ရှင်လူတယောက်ထဲ တကိုယ်တော်ဆိုပါတော့။ဒီလိုနဲ့ ရှင်လူကြီးရဲ့ ၇၁ နှစ်မြောက်မွေးနေ့ နိုဝင်္ဘာ ၂၉ ရက်ကိုရောက်လာခဲ့တယ်။ရောက်ဆဲ ရာသီဥတုတွေကလည်း အေးစိမ့်စိမ့်မို့ လုပ်ခွင်ထဲ မလန်းမဆန်းဖြစ်တဲ့ခါ ရှင်လူကြီးသော့ခတ်ထားတဲ့သံဘာဂျာတံခါးရှေ့ထိုင်ရင်းဆိုင်ရှေ့ကိုငေးမောနေမိတယ်။ဒီမှာ သူ့ကိုသတိထားမိတာပဲ။သူဆိုတာက အသက်၂၀ကျော်
၃၀ ဝန်းကျင်နီးပါး စိတ်မနှံ့ပုံရတဲ့ လူငယ်လေးတယောက်ပါ။သူက လက်တွေကိုလေထဲမြှောက်လိုက်ချလိုက် ၊အမြဲလိုလိုကောက်လာတဲ့ပစ္စည်းအတိုအစ အဟောင်းအမြင်းတွေနဲ့
ထွေးလုံးနေလို့သာ သူ့ကိုရူးနေမှန်းသိရတာပါ။ဝတ်ပုံဆင်ပုံကလည်း တခါတရံ
ပုဆိုးနဲ့စွတ်ကျယ်နဲ့တခါတရံ ရှော့ပန်နဲ့ စပို့ရှပ်နဲ့ သန့်သန့်ပြန့်ပြန့်မျက်နှာသွယ်သွယ် ဥပဓိရုပ်ကောင်းကောင်းမို့မသိရင်
လူငယ်ဝန်ထမ်းတယောက်လိုပါပဲ။ရှင်လူ သူ့ကိုမသိမသာလေ့လာကြည့်တော့ သူက ရှင်လူတို့ကုမ္ပဏီဆိုင်ခေါင်းရင်းက
မီးလောင်ထားတဲ့ဆွန်နီမိဘမဲ့စာသင်ကျောင်းမှာနေမှန်းသိရတယ်။အဲ့အဆောက်အဦက လွန်ခဲ့တဲ့သုံးလေးနှစ်ဝန်းကျင်မီးလောင်ပြီးကထဲက ပြန်မဆောက်ရသေးပဲ ဒီတိုင်း သွပ်ပြား ဝါးကပ်တွေနဲ့ကာရံထားတာ ၊တချို့က အရံအတားတွေချိုးဖျက်ပြီးဝင်ကြထွက်ကြ။တချို့လှည်းသမားတွေက သစ်တိုသစ်စနဲ့ သွပ်ပြားတွေ သယ်ပြီးရောင်းစားကြပေါ့။ရှင်လူလည်း ကိုယ့်ကုမ္ပဏီဆိုင်နဲ့ကပ်ရက်မို့ လူဝင်လူထွက်ကိုအမြဲဂရုစိုက်ကြည့်နေရတာ ခုတော့ ဒီကိုယ်တော်လေးအမြဲ ပင်တိုင်နေတော့ တခြားလူဝင်လူထွက်တော့ကျဲပါးသွားတယ်။မိုးတွင်းတုန်းကတော့ အဆောက်ဦအတွင်းပိုင်း အကွယ်အကာတစွန်းတစရှိတဲ့အောက် မှာသူဝင်အိပ်လေ့ရှိတယ်။ခုမိုးကုန်တော့
အဆောက်အဦရှေ့ အရင်မီးစက်လား ရေစက်လားမသိ၊ ထားဖို့လုပ်ထားတဲ့ အုတ်ဘောင်ထဲသူအိပ်တယ်။သူ့အိပ်တဲ့အသိုက်ကသိသာပါတယ် မွေ့ယာနဲ့ခြင်ထောင်နဲ့ ခပ်သန့်သန့်မို့ မြင်ရင်ကိုယ်တောင်ဝင်အိပ်ချင်လာတယ်။အမှန်တော့ သူနဲ့ရှင်လူဟာ ခေါင်းရင်းခြေရင်းကပ်ရက်မို့ ရေစက်ရှိပုံရပါတယ်။ဒါပေမယ့်ရှင်လူကသူ့ကို အရောတဝင်လုပ်ဖို့နေနေသာသာ စေ့စေ့တောင်မကြည့်ပဲ မျက်နှာလွှဲ့နေလေ့ရှိပါတယ်။တခါတုန်းကရှင်လူ့ အိမ်နီးချင်းစိတ်မနှံ့သူ ကိုတင်အောင်ဆိုတာနဲ့ကြုံဖူးပါတယ်။အိမ်နီးချင်းဆိုတော့ပုံမှန်ဆက်ဆံရေးတော့ရှိပါတယ်။တနေ့ သူခြင်းခတ်နေတာကိုရှင်လူကကြည့်နေတုန်းရုတ်တရက်စိတ်ဖောက်လာပြီး ဒေါသတကြီးနဲ့ ရှင်လူ့ကို အကြောင်းမဲ့ထဆဲပါတယ်။အဲ့ချိန်ကစပြီး စိတ်မနှံ့သူဆို ရှင်လူရဲရဲတောင်မကြည့်ဝံ့ပါ။ခုလည်းဒီကိုယ်တော်လေးကတခါတခါ ရှင်လူ့ကို လက်ဖြန့်လာပါတယ်။ရှင်လူကသူ့ကိုအရောမဝင်ရဲလို့ ဘာမှမပြောပဲလက်ကာပြလိုက်ရင်သူပြန်ထွက်သွားပါတယ်။တနေ့တော့ ရှင်လူ့ဆိုင်ရှေ့က ပန်းပင်ရေလောင်းဖို့ တပ်ထားတဲ့ရေဘုံပိုင်ခေါင်းမှာ ရေသန့်ဘူးနဲ့ သူရေလာယူပါတယ်။ပြီးတော့ မျက်နှာသစ်သန့်စင်တာကိုရှင်လူမသိမသာကြည့်နေပါတယ်။ဘုံပိုင်ခေါင်း
မပိတ်ဘဲထွက်သွားရင်ဒုက္ခပဲ၊ ရှင်လူသော့ဖွင့်ပြီးထွက်ပိတ်ရရင်အလုပ်ရှုပ်မှာ။ဒါပေမယ့် သူ့ကိစ္စပြီးတော့ ဘုံပိုင်ကိုအသေအချာပိတ်သွားပါတယ်။ဒီလိုပဲ နောက်နေ့တွေလည်း သူမကြာခန ရေလာသုံးတတ်ပါတယ်။သုံးပြီးတိုင်းလည်းရေကိုပိတ်သွားပါတယ်။တနေ့တော့ ရှင်လူ စီးကရက်တလိပ်မီးညှိပြီးထိုင်စမှာ သူရောက်လာပြီး လက်ဖြန့်ပါတယ်။ဒါနဲ့ရှင်လူလည်း သောက်လက်စ စီးကရက်ပေးလိုက်တော့ သူက စမတ်ကျကျ လက်ကြားညှပ်ဖွာရင်းထွက်ခွါသွားပါတယ်။ဒီလိုနဲ့ သူနဲ့ရှင်လူကြားမှာ စီးကရက်ယဉ်ကျေးမှုထူထောင်ဖြစ်ကြပါတယ်။တညနေ ရှင်လူ့ရှေ့ သူရောက်လာပြီး
"ဘိုက်ဆာလို့ ထမင်းစားချင်လို့"ဆိုပြီးလက်ဝါးဖြန့်ပါတယ်။ရှင်လူက နဂိုရ်ကထဲကပေးချင်နေတာပါ။နောက်ဆက်တွဲပြဿနာတွေကြောက်လို့ တွန့်ဆုတ်နေတာပါ။ခုတော့ ရှင်လူသူ့ကိုသိတ်မကြောက်တော့။အိတ်ထဲ့က ငါးရာတန်အသစ်တရွက်ထုတ်ပေးလိုက်ပါတယ်။ဒါတောင် ငါးရာဆိုတာနည်းမှန်းသိပါတယ်။နောက်နောင်အဆင်ပြေဖို့ကသူ့အပေါ်မှာပဲ မူတည်ပါတယ်။ဒီလိုနဲ့ ဒီအရူးလေးနဲ့ရှင်လူရဲ့ သံယောဇဉ်ကပိုမိုခိုင်မြဲလာပါတယ်။မနက်မနက် ရှင်လူလက်ဖက်ရည်ဆိုင်ကအပြန် အင်္ဂတေဘောင်ခြင်ထောင်ထဲမှာသူအိပ်မောကျနေပုံကိုအမြဲတွေ့နေရပါတယ်။
ဒီလိုနဲ့ ၂၀၂၄ နိုဝင်္ဘာ၊ဒီဇင်္ဘာ ကုန်ပြီး ၂၀၂၅ ဇန္နဝါရီလထဲရောက်လာခဲ့ပါတယ်။ရာသီဥတုကြောင့်ပဲလား ကျန်းမာရေးကြောင့်ပဲလားမသိ၊ အေးသလိုလိုရှိလို့ အနွေးထည်ကောက်ဝတ်လိုက်ရင် အိုက်သလိုလိုဖြစ်ပြီးပြန်ချွတ်ရပြန်ရော။အဲ့လိုနဲ့ ဇန္နဝါရီရဲ့မနက်ခင်းတခုပေါ့ ကိုယ်တော်လေးရဲ့အဆောင်ရှေ့မှာ စည်ပင်ဝန်ထမ်းတွေရောက်နေတယ်။စက်ဘီးဒေါက်ထောက်ပြီး ဝတ်စုံပြာနဲ့ ကြည့်ကြပ်သူလို့ထင်ရသူက ရှင်လူ့ဘက်လှည့်ကြည့်ရင်း "အမှိုက်တွေရှင်းနေတာ"တဲ့။ကောင်လေးရဲ့အသိုက်တဝိုက်ကိုအမျိုးသမီးနှစ်ယောက်က တံမျက်စည်းနဲ့သိမ်းကြုံးလှည်းနေရဲ့။ကောင်လေးအရိပ်အယောင်ကိုတော့လုံးဝမတွေ့ရ။ဒီလိုနဲ့ နောက်ရက်တွေ နောက်ရက်တွေမှာလည်း ကောင်လေးအသိုက်ရှိရာဘက်ကို သတိရတိုင်း ငေးနေမိပြန်ပေါ့။
5,Jan,2025
story#observation#shinlhu
No comments:
Post a Comment