ငြိမ်းချမ်းရေးအနုပညာ
ဒီမနက် ရှင်လူကြီးအလုပ်ကအိမ်ပြန်ရောက်တော့ ဖွေးဖွေသိမ့်တယောက် ကျောင်းမသွား။သူ့မူကြိုဆရာမတွေ ဘုရားဖူးသွားလို့ ကျောင်းပိတ်တယ်တဲ့။ သူ့အဖေမောင်ဝင်းကလည်း အလုပ်နားတော့ အိမ်မှာရှိနေတယ်။ ရှင်လူ သူတို့အခန်းထဲဝင်သွားတော့ ဖွေးက မှောက်ရက်ကြီး
ဖုန်းနဲ့ ကာတွန်းကားတွေကြည့်နေတယ်။
သူ့အဖေ မောင်ဝင်းက အဝတ်လျှော်ကျောက်ပြားမှာ အဝတ်တွေ တဇလုံကြီးနဲ့ ထိုင်ဖွပ်နေတဲ့ သူ့မိန်းမ ငမိုးရိပ်ကို လှမ်းပြီး မကြေမနပ်ပြောနေတယ်။ "အဝတ်တွေက
ဒီလောက်အများကြီး တနေကုန်လျှော်နေစရာမလိုဘူး၊ တနေ့ နည်းနည်းချင်း ဖွပ်သွားရင်ရနေတာပဲ"။ မောင်ဝင်းပြောနေပေမယ့် ငမိုးရိပ်က မကြားသလိုနဲ့ အဝတ်ဆက်ဖွပ်နေတယ်။ တကယ်တော့ မောင်ဝင်းက Coca Cola မှာ Delivery လုပ်နေတာ၊ Box ကားနဲ့ တမြို့လုံး နှံ့အောင်Coca Cola ပုလင်းတွေလိုက်ပို့ရတာ။ကိုယ်တိုင်လည်းကားမောင်းရသေး၊ တခါတခါ အခန့်မသင့်လို့ ပစ္စည်းကွဲလည်းလျှော်တဲ့အခါလျှော်ရ၊ ထိခိုက်ဒဏ်ရာရတဲ့အခါလည်းရပေါ့။ တကယ်တော့ ခုလို ရှားရှားပါးပါးနားတဲ့နေ့မျိုးမှာ မိန်းမနဲ့ မျက်နှာချင်းဆိုင်ပြီး ကြည်ကြည်နူးနူး စကားတွတ်ထိုး နေချင်စိတ်ကတော့ မလွဲမသွေရှိမှာပဲ။ ရှင်လူလည်း အိမ်ထောင်သည်ဘဝအတွေ့အကြုံရှိခဲ့လေတော့ ယောင်္ကျားချင်းအထာသိတယ်။ဒါကို.. ဟို ဖွေးအမေငမိုးရိပ်က မသိကြိုးကျင်ပြုနေတယ်။
အထူအပါးနားမလည်တာလည်းပါတယ်။
အထူးသဖြင့် ကိုယ့်အိမ်ထောင်ဘက်ရဲ့
နေရာကဝင်ပြီး ခံစားနားလည်တတ်ဖို့က ကိုယ်ချင်းစာတဲ့ အနုပညာတခုပဲလေ။
အဲတော့ မောင်ဝင်းက စိတ်ထဲ တင်းနေပုံရတယ်။ ဒီအချိန်မှာ ဖွေးက မှောက်ပြီး ဖုန်းနဲ့မျက်နှာကပ်ကြည့်နေတာတွေ့တော့..
"သမီး...ဖုန်းကိုကပ်မကြည့်နဲ့လေ၊တပေလောက်ခွာကြည့်"ဆိုတော့..ဖွေးဆိုတာကလည်း တရပ်တရွာလုံးက အလိုလိုက်ခံထားရသူမို့လား...မျက်နှာက ချက်ချင်းမဲ့သွားပြီး အောက်ကိုလျှောချလိုက်တာ
လူကိုယ်တိုင် ထမင်းစား စားပွဲအောက်ရောက်မတတ်ပဲ၊ အရွဲ့တိုက်ပုံက။"လူကြီးက
မတော်လို့ ဆုံးမနေတာကို နားမထောင်ချင်ဘူး၊ ငါဖုန်းပါယူပြီးလွှင့်ပစ်လိုက်မယ်"
မောင်ဝင်းက ဒေါသသံနဲ့လည်းငေါက်ကရော ဖွေးက အီကနည်း ငိုသံထွက်လာတယ်။ ဒီတော့ စောစောက မိန်းမအပေါ်မကြေနပ်နေတဲ့ မောင်ဝင်း ဒေါသတွေက ဖွေးအပေါ်ပုံကျသွားတယ်။ ဖွေးလက်ထဲကဖုန်းကို ဆတ်ခနဲ ဆွဲယူပြီးကြမ်း ပေါ်ကိုင်ပေါက်လိုက်တာ ဗြန်းခနဲ...၊ ဖွေးလည်းလန့်ငိုပြီးထပြေးလာတော့ ရှင်လူကြီးက ဆွဲပြီး
ရင်ခွင်ထဲပိုက်ထားလိုက်ရတယ်။ အရိပ်သုံးပါး နားမလည် ချေသူငယ်ကျားစာမိ ဆိုတာ ဒါမျိုးပေါ့။ ဝမ်းနည်းပက်လက်အော်ငိုနေတဲ့ ဖွေးကိုချီပြီး ရှင်လူကြီး အပြင်ထွက်လာခဲ့တယ်။ ဖွေးကိုအရုံပြောင်းဖို့က အန်တီမတင့်ဆိုင်ပဲရှိတာလေ။ ဒါနဲ့
နှစ်ယောက်သား မတင့်ဆိုင်ရောက်တော့
"သမီးလေး ဘာစားမလဲ၊အိုဗာတင်းသောက်မလား"ဆိုတော့ ဖွေးက ခေါင်းခါပြီး
ပလပ်စတစ်မျက်နှာဖုံး ကိုလက်ညိုးထိုးတယ်။ဒီတော့ သူကြိုက်တဲ့ ပါဝါရိန်းဂျားမျက်နှာဖုံးကို တရာနဲ့ဝယ်ပေးလိုက်တယ်၊
ကစားစရာအတန်းမှာ မြွေလှေခါး ကစားတဲ့ကဒ်လေးတွေ့လို့မေးလိုက်တော့လည်းတရာဆိုတာနဲ့ တခုထပ်ဝယ်လိုက်တယ်။
ပြီးတော့ မုန့်စင်ဘက်ခေါ်သွားပြတော့
ဖွေးက နှစ်ရာတန် ပန်းကိတ်တခုယူတယ်။
အိမ်ပြန်ရောက်တော့ သူမကစားဘူးသေးတဲ့ မြွေလှေခါး ကဒ်လေးချ၊ အန်စာတုံးခေါက်ပြီး "ဒီအနီလေးကသမီး၊ ဟောဒီ အစိမ်းက ရှင်လူ ၊ အမှတ်တရာရရင်နိုင်ပြီ၊
နိုင်တဲ့လူက ရှုံးတဲ့လူကို နဖူးတောက်ကြေး"ဆိုတော့ ဖွေးကသဘောတူတယ်။
"ဟော...နံပတ်ငါးဆို သမီးအနီလေးငါးကွက်ရွှေ့ ၊လှေခါးအကွက်ဆို အပေါ်ကျော်တက်သွားပြီ..""အာ..ရှင်လူက ခြောက်၊
တစ် နှစ်သုံး လေးငါးခြောက်..ဗုဒ္ဓေါ...မြွေမျိုပြီ၊ ပြန်ဆင်း"။ ကစားနေရင်းနဲ့ပဲ...
ဖွေးတယောက် စောစောကငိုခဲ့တာတွေမေ့ပြီး ပြုံးပျော်နိုင်လာတယ်။
အင်း..မိသားစု တခုထဲမှာ ငြိမ်းချမ်းဖို့က
မလွယ်လှဘူး။တယောက်နဲ့တယောက် ရင်ထဲရှိတာတွေကို အပြန်အလှန်နားလည်ဖို့က အရေးကြီးတယ်။နားမလည်နိုင်လို့
ပြဿနာဖြစ်တော့..ကြားက မြေစာပင်လည်းမသက်သာ။ တောင်ပြိုရာ မြက်ပြတ်သတဲ့။ ရှင်လူတို့ မီယန်မာနိုင်ငံကြီးမှာ
ပြည်တွင်းစစ်က ရှည်လှပြီ။ တိုင်းရင်းသားအချင်းချင်း ခုချိန်ထိ စာနာနားလည်မှုမရနိုင်သေး။ စစ်ပွဲတွေက နေ့စဉ် တဂျိန်းဂျိန်း။
အင်တာနက်ထဲက ပြည်တွင်းစစ် Vedio
ဖိုင်တွေ ဖွင့်လိုက်မိရင် ကျည်ဆန်တွေကပလူပျံနေတယ်။ တိုက်ပွဲဝင် ရဟတ်ယာဉ်တွေ တိုက်လေယာဉ်တွေနဲ့ ဗုံးကြဲ ပစ်ခတ်နေတာ မြင်လို့မကောင်း။ ဒါ ..သြဠာရိက
အကြမ်းနည်း။ ဒါပေမယ့် တဖက်က
စားပွဲဝိုင်းမှာ ဖြေရှင်းဖို့ ကြိုးစားနေကြတာလည်း တံခါးဖွင့်ထားတာတွေ့ရတယ်။
စားပွဲဝိုင်းကတော့ တကယ့် သုခုမပဲ။
ငြိမ်းချမ်းရေး အနုပညာ အားကောင်းပြီး
အကြမ်းပတမ်းစစ်ပွဲတွေကို ကျော်လွှား
နိုင်မှ တိုင်းပြည်ရဲ့ လူသယံဇာတ၊ ရေမြေတောတောင်သယံဇာတတွေ ဖွံ့ဖြိုးတိုးတက်လာမယ်။တဖက်က လေယာဉ် တွေနဲ့တဝုန်းဝုန်းဆော်တော့ တဖက်ကလည်း
ကြွက်မနိုင်ကျီမီးရှို့ဆိုသလို နိုင်ရာဖိထောင်းမယ်။အထင်မှားအမြင်မှားရုံနဲ့ အရပ်သားပြည်သူတွေကိုဖမ်းဆီးနှိပ်စက်မယ်။
တရုပ်စာရေးဆရာကြီးလူးရွှန်းပြောဖူးတဲ့စကားတခွန်းရှိတယ်။
"တော်လှန်ရေးသမားကို တန်ပြန်တော်လှန်ရေးသမားကသတ်တယ်၊ တန်ပြန်တော်လှန်ရေးသမားကို တော်လှန်ရေးသမားကသတ်တယ်၊ မတော်လှန်ရေးသမားကိုတော့ တော်လှန်ရေးသမားကရော
တန်ပြန်တော်လှန်ရေးသမားကရော
နှစ်ဖက်စလုံးကသတ်တယ်" တဲ့။
ငြိမ်းချမ်းရေး အနုပညာ မအောင်မြင်သေးလို့ကတော့ ရှင်လူတို့ အရပ်သားပြည်သူများ အရိပ်သုံးပါးနားမလည် ချေသူငယ်
ကျားစာမိ မဖြစ်ရအောင် ဘေးလွတ်ရာပြေးလွှား ပုန်းအောင်းခိုလှုံကြပါကုန်။
story #observation#shinlhu
