စပ်ကူးမတ်ကူးအရွယ်💐🥳
"ရှင်လူ မဝင်လာနဲ့အုံး"
ရှင်လူ အပေါ့သွားချင်လို့ နောက်ဘေးခန်းကိုအလာ
ဖွေးဖွေးသိမ့်က လှမ်းအော်တာကြောင့် အိမ်ရှေ့ခန်းဘက်ပြန်ထွက်ခဲ့ရတယ်။ခဏနေမှ "ရပြီ လာတော့"ဆိုမှ ရှင်လူ Toilet ဝင်ခွင့်ရတယ်။နောက်ဘေး အုတ်ကန်မှာဖွေးရေချိုးနေတာလေ။သူ့ပုခုန်းပေါ် တဘက်နဲ့အသေအချာ ခြုံပြီးမှ ရှင်လူ့ကိုဖြတ်သန်းခွင့်ပြုတယ်။ရှင်လူ့စိတ်ထဲတော့ ရီချင်ချင်ပေါ့ ၊ဖွေး ပုလုကွေးအရွယ်ကတည်းက ရှင်လူ ဓပုံတွေ အများကြီးရိုက်ပြီး FB တင်ခဲ့တာ။အမှန်တော့ မနှစ်ကအထိ ဖွေး အိမ်ရှေ့ကျောက်ပြားမှာဖင်တုံးလုံးနဲ့ရေချိုးတုန်း။အင်း..ဒီနှစ်တော့ အများကြီးခြားနားသွားပြီ။၁၂ နှစ်သမီးဆိုပေမယ့် သူ့အမေငမိုးရိပ်အရပ်ကိုကျော်နေပြီ။အရပ် ကလန်ကလားက သူ့အဖေမောင်းဝင်းကိုတူတာ။အပျိုကြီးစတိုင် မှန်ရှေ့လည်းခဏခဏရပ်တတ်နေပြီ။ဒါပေမယ့် ကလေးစိတ်ကလည်းမကုန်သေး။အဲဒါ ဒီနေ့ အိမ်ရှေ့မှာ တီဗွီဘူးခွံကတ်ပြားကြီးခင်းပြီး ဘူးတွေခွက်တွေဆေးကျော စီတန်းပြီးဈေးဆိုင်ခင်းနေရဲ့။သစ်ရွက်တွေခူးပြီးကပ်ကြေးနဲ့ ညှပ်ပြီးဟင်းလျာပြင်ဆင်နေတယ်။အရာရာစံနစ်ကျတဲ့ဖွေးက စောစောကတည်းက စာရွက်တရွက်ပေါ် MENU စာရင်း ၁၀ မျိုးလောက်ရေးပြီး တံခါးပေါက်နားမှာ တိပ်နဲ့ကပ်ပြီးသား။
"ရှင်လူ ဒီကိုလာ"
အင်း..အမြဲတန်း လုပ်နေကျအတိုင်း သူဆိုင်ဖွင့်ရင် ရှင်လူက Customer လုပ်ပေးရတယ်။
"ဘာစားမလဲ အကို"
"အင်း..ကန်စွန်းပလိန်းတပွဲ နဲ့ ငါးသံပုရာပေါင်းတပွဲ"
"ရမယ်အကို ခဏစောင့်ပါ"
သူလုပ်နေတာစောင့်ရင်း ရှင်လူက ကတ်ကြေးနဲ့ ကဒ်ဘူးခွံကိုညှပ်ပြီး ငါးနှစ်ကောင်နဲ့ ဘဲကင်တကောင်လုပ်ပေးလိုက်တော့ သူသဘောကျသွားတယ်။သူ့ကိုကြည့်နေရင်း ရှင်လူသတိရပြီး အားသွင်းထားတဲ့ဖုန်းထဖြုတ်တော့
"လုပ်ပြီ...ဓပုံရိုက်ပါနဲ့ဆို၊တင်အုံးမယ်"
ချက်ချက်းမျက်နှာကို လက်နဲ့ကွယ်လိုက်တယ်။ဒါနဲ့ရှင်လူလည်း သူ့ MENU စာရွက်ကိုရိုက်ဖို့ရွယ်လိုက်တော့ လက်ဖဝါးနဲ့လာအုပ်တယ်။
ဘာရယ်တော့မဟုတ်ပါဘူး ၊ကလေးစိတ်မကုန်သေးတဲ့ အပျိုဖျန်းလေးစပ်ကူးမတ်ကူးသဘာဝကိုချစ်တဲ့စိတ်နဲ့မှတ်တမ်းတင်နေမိတာပါ။
ဒီနေ့တင်တဲ့တပုံကတော့ ဓပုံရိုက်တာမကြိုက်မှန်းသိလို့ သူ့အမေဖုန်း Gallery ထဲက အလစ်သုတ်ပြီး ရှင်လူ့ Messenger ထဲခိုးပို့ထားတဲ့ပုံပါ။အင်း ..ဒီသားအမိတွေကြောင့် အဒိန္နဒါနာ ကျိုးပြီ။
story #observation#shinlhu
No comments:
Post a Comment